Локални ѕвезди со глобални успеси е главната тема на првата конференција во Македонија која ќе ги собере на едно место највлијателните експерти во областа на социјалните медиуми, дигиталниот маркетинг и технологиите.

Преку инспиративни говори на познати маркетинг стручњаци и низа панел дискусии со влијателни професионалци од повеќе различни индустрии во Македонија, ќе се разгледуваат новите трендови и стратегии во дигиталниот маркетинг и технологиите.

Во посебни сесии, ќе бидат презентирани успешни приказни на познати спикери, претприемачи, технолошки експерти, инфлуенсери и контент креатори кои со своите оригинални креативни идеи и бизнис потфати станале вирални и постигнале глобален успех.

Socialize Awards им оддава признание на македонските технолошки компании, институции, агенции и контент креатори за најквалитетни и најпрофесионални индивидуални и интегрирани кампањи и проекти кои постигнале врвни деловни резултати и препознатливост на брендот во текот на изминатата година.

Целта на Socialize Awards е да ги поттикне и мотивира македонските експерти за дигитални производи и технолошки решенија, социјални медиуми и дигитален маркетинг, како и да ја истакне нивната способност, талент и креативност пред стручната јавност, а истовремено и да придонесе за подобрување и развој на овие иновативни професии во Македонија.

Почнувајќи од оваа година, сите заинтересирани технолошки компании, агенции, фриленсери и контент креатори од Македонија ќе можат да се пријават за престижните награди Socialize Awards, кои во периодот од 1.4.2024 година до 1.4.2025 година успешно ги реализирале своите кампањи на македонскиот пазар.

Номинациите се отворени до 10 април 2025 година и се целосно бесплатни.