26.9.2025

Креативноста може да привлече внимание, но само податоците ја откриваат вистинската моќ. Огнен Огненовски, основач и извршен директор на BiznisMreza.mk и долгогодишен аналитичар на корпоративните движења, ја отвори конференциската програма на фестивалот за дигитална креативност и технологии „Socialize 2025“ и понуди уникатен преглед врз македонската агенциска сцена, поткрепен со конкретни податоци, прецизни анализи и остри согледувања. 

Агенции со раст и оние што исчезнуваат 
Од бројот на новоосновани компании до стапката на преживување, Огненовски ја откри динамиката што стои зад сјајот на маркетинг индустријата. Презентацијата покажа дека зад секоја кампања стои бизнис структура што мора да биде флексибилна, солвентна и стратешки позиционирана. Податоците за згаснати агенции беа потсетник дека креативноста без менаџмент не е одржлива. 

Каде е силата по градови и по сопственост 
Интересно откритие беше територијалната распределба на агенциите, како и структурата по сопственост. Доминираат агенции од Скопје, но втората маркетинг ера полека се шири надвор од главниот град. Презентацијата го отвори прашањето: Дали пазарот е навистина конкурентен, или централизираниот пристап сѐ уште доминира во креативната економија? 

Топ 10 со реален импакт и плата што ја следи продуктивноста 
Листите на ТОП 10 агенции според приходи, добивка и број на вработени беа најочекуваниот сегмент – и најсподелуван дел од презентацијата. Вредноста не се мери само во кампањи, туку и во нето плата, наплата на побарувања и долгорочна бонитетна оцена. Како што Огненовски рече: „Податоците зборуваат, вие одлучувате.“ А маркетинг професионалците што беа присутни, сигурно излегоа од салата со многу идеи и уште повеќе прашања. 

Анализата беше важен сигнал: време е агенциите да се гледаат не само како креативни партнери, туку како сериозни бизнис ентитети со мерлив импакт.